Campaña Marbanga

Concluír se as actuais alteracións do clima forman parte da evolución natural ou son consecuencia directa da intervención humana é o obxectivo principal da campaña Marbanga, un proxecto liderado polo grupo de investigación Geoma (Xeoloxía Mariña e Ambiental) da Universidade de Vigo, que tratará de estudar o paleoclima dos últimos 30.000 anos como fórmula para entender as condicións climáticas da actualidade.

O obxectivo principal do programa Marbanga é o de recoller sedimentos no mar, pero, segundo explica Daniel Rey, «é posible encontrar mesmo información da zona continental, xa que o que os ríos arrastran ata o fondo mariño permite determinar as condicións en terra».
A costa galega foi a elixida para este estudo, porque, como describen os coordinadores do proxecto, se trata dunha zona que ten mostras de sedimentos que, «forzados climaticamente», permitirán sacar conclusións de «grande importancia rexional».